श्री क्षेत्र कडापे — “शिव – शक्ती – भैरव” यांच्या जागृत वास्तव्यामुळे सिद्ध झालेले एक अद्वितीय शक्तीपीठ, रायगडाच्या निसर्गरम्य कुशीत विसावलेले हे पवित्र स्थळ भक्तांसाठी अध्यात्मिक ऊर्जा आणि श्रद्धेचे केंद्र आहे.
या भूमीत श्री बापुजीबुवा — साक्षात भगवान शिव यांचे स्वयंभू आत्मलिंग विराजमान आहे. त्यांच्या इच्छेनुसार येथे श्री कालीका माता आणि श्री काळभैरव यांचेही पवित्र वास्तव्य आहे. या त्रिदेवांच्या जागृत उपस्थितीची दिव्य अनुभूती प्रत्येक भक्ताला येथे लाभते, आणि ती अनुभूती मनाला शांती, समृद्धी, शक्ती आणि सकारात्मकता प्रदान करते.
चांद्रसेनीय कायस्थ प्रभु समाजाची प्रमुख कुळदेवता तसेच कडापे क्षेत्राची ग्रामदैवत म्हणून, या शक्तीपीठाची अनेक दशके अखंड भक्तिभावाने व अपार श्रद्धेने पूजा केली जात आहे. येथे केलेल्या पूजनाने देवी-देवतांचा आशीर्वाद लवकर प्राप्त होतो, आणि भक्तांच्या मनोकामना पूर्ण होतात, असा दृढ विश्वास आहे.
आजच्या आधुनिक युगात, भक्तांच्या सोयीसाठी आम्ही तंत्रज्ञानाचा स्वीकार करून संस्थेचे सर्व धार्मिक विधी, पूजाअर्चा, तसेच विविध सेवा यांची माहिती या अधिकृत वेबसाइटच्या माध्यमातून उपलब्ध करून देत आहोत. अभिषेक, कुंकुमार्जन, भैरव पूजन, नवचंडी यांसारख्या धार्मिक कार्यक्रमांसाठी ऑनलाइन बुकिंगची सुविधा उपलब्ध केल्यामुळे, भक्तांना त्यांच्या वार्षिक कुळाचार आणि कुळधर्माचे नियोजन अधिक सुलभ आणि सोयीस्कर झाले आहे.
यासोबतच, संस्थेतर्फे राबविण्यात येणाऱ्या CSR उपक्रमांमध्ये आणि विविध सामाजिक कार्यांमध्ये सहभागी होण्याची संधीही या माध्यमातून उपलब्ध आहे. आपल्या सहकार्याने आणि सहभागाने हे पवित्र कार्य अधिक व्यापक आणि प्रभावी होईल, असा आम्हाला विश्वास आहे.
आपण सर्व भक्तांनी या सुविधांचा योग्य उपयोग करून, श्री क्षेत्र कडापेच्या दिव्य शक्तीचा लाभ घ्यावा, हीच नम्र विनंती.